कुरिनटार । इच्छाकामना गाउँपालिकाले चालू आर्थिक वर्षको आठ महिनामा जम्मा ३३ दशमलब १४ प्रतिशत बजेट खर्च गरेको छ । आर्थिक वर्षको चार महिनामात्रै बाँकी रहँदा आधा बजेट पनि खर्च नहुँदा गाउँपालिकाको कार्यसञ्चालनमा प्रश्न उठ्न थालेको छ । विगतका वर्षहरुका तुलनामा यो प्रतिशत कम हो । पुँजीगततर्फ जम्मा १५ दशमलब ४६ प्रतिशत खर्च भएको छ । चालूतर्फ ४६ दशमलब ३ प्रतिशत रकम खर्च भएको देखिन्छ ।

भौतिक तथा वित्तीय प्रगति हेर्दा चालूतर्फ ४३ करोड ५२ लाख २१ हजार रूपैयाँ बजेट विनियोजन हुँदा २० करोड १७ लाख १५ हजार रूपैयाँ खर्च भएको छ भने पुँजीगततर्फ ३२ करोड ५० लाख ८० हजार रूपैयाँ रकम विनियोजन हुँदा पाँच करोड दुई लाख रूपैयाँमात्रै खर्च भएको छ ।

तर, आर्थिक वर्ष सकिँदासम्ममा विगतकै लक्ष्यअनुसार खर्च प्रतिशत बढ्न सक्ने गाउँपालिकाको प्रक्षेपण थियो । यसवर्ष भदौ २३ र २४ को आन्दोलन र त्यसपछि गठित सरकार चुनावकेन्द्रित हुँदा लक्ष्यअनुसारको खर्च गर्न नसकेको गाउँपालिकाका प्रमुख प्रशासकीय अधिकृत चन्द्रकान्त बस्नेत बताउँछन् ।

‘विगतका वर्षहरुमा हामीले करिब ८७ प्रतिशतसम्म खर्च गरेका छौँ । तर, चालू आर्थिक वर्षमा आन्दोलन र त्यसपछिको निर्वाचनका कारण कतिपय बजेट चलाउनै पाएनौँ’, उनी भन्छन्, ‘अबको चार महिनाभित्र काम सम्पन्न हुने र त्यसको भुक्तानी निकासाको क्रम पनि बढ्छ ।’

गाउँपालिकाले आर्थिक वर्ष २०८२/०८३ का लागि ७६ करोड तीन लाख एक हजार रूपैयाँ बजेट विनियोजन गरेकोमा गत फागुन मसान्तसम्मको विवरणअनुसार जम्मा ४७ करोड ३१ हजार रूपैयाँमात्रै खर्च भएको देखिएको छ ।

गत तीन आर्थिक वर्षको अवस्था हेर्ने हो भने इच्छाकामना गाउँपालिकाले सबैभन्दा धेरै २०८०/०८१ मा खर्च गरेको थियो । उक्त वर्ष ६७ करोड चार लाख १९ हजार रकम विनियोजन हुँदा ५८ करोड २९ लाख ४४ हजार अर्थात् ८६ दशमलब ९५ प्रतिशत रकम खर्च गर्न सफल भएको थियो ।

त्यसअघि २०७९/०८० मा पनि ७७ करोड ५९ लाख ९४ हजार रूपैयाँ रकम विनियोजन हुँदा ६१ करोड २८ हजार ९७ लाख रूपैयाँ अर्थात् ७८ दशमलब ९८ प्रतिशत रकम खर्च भएको तथ्याङ्क गाउँपालिकासँग छ । आर्थिक वर्ष २०८१/०८२ मा पनि ७७ करोड ९८ लाख आठ हजार रूपैयाँ रकम विनियोजन हुँदा ६६ करोड ७३ लाख २९ हजार अर्थात् ८५ दशमलब ६ प्रतिशत रकम खर्च भएको थियो ।

विगतको आँकडा हेर्दा यसवर्ष कम खर्च हुने अनुमान गर्न सकिन्छ । तर, गाउँपालिकाले भने भुक्तानी हुने समय बल्ल आएको हुँदा खर्च प्रतिशत बढ्ने दाबी गरेको छ । ‘आन्दोलन र निर्वाचनले कार्यप्रगति केही प्रभावित भए पनि त्यसबाहेकका समयमा काम रोकिएका छैनन्, त्यसकारण खर्च प्रतिशत आर्थिक वर्षको मसान्तसम्म नजिक पुग्ने अनुमान छ’, उनी भन्छन् । पालिकाले दोस्रो चौमासिकमा एक करोड ७९ लाख ४९ हजार आन्तरिक आय गर्न सफल भएको छ ।