काठमाडौँ। गत भदौ १० गते रसुवाको भोटेकोशी नदीमा आएको बाढीबाट प्रभावित नागरिकलाई लक्षित गरी नेपाल टेलिकमले विभिन्न राहत तथा सञ्चार सुविधा थप गरेको छ । कम्पनीले रसुवा, धादिङ, गोरखा, चितवन, नुवाकोट र तनहुँका बाढी प्रभावित नागरिक तथा पृथ्वी राजमार्गअन्तर्गत गल्छी–नुवाकोट–रसुवा–स्याफ्रुबेँसी र मुग्लिन–नारायणगढ सडक क्षेत्र आसपासका प्रभावितलाई लक्षित गरी सुविधा उपलब्ध गराएको हो ।

यसैगरी, राष्ट्रिय विपद् जोखिम न्यूनीकरण तथा व्यवस्थापन प्राधिकरणको एकीकृत विपद् सूचना व्यवस्थापन केन्द्र (आइडिएमसी) मा रहेको मुख्य सर्भरदेखि प्राधिकरणको ब्याकअप सर्भरसम्म निःशुल्क जडानका लागि डार्क फाइबरमार्फत भौतिक सम्पर्क स्थापना गरिएको छ ।

विज्ञप्तिअनुसार बाढी प्रभावित नागरिकलाई प्राथमिक मनोवैज्ञानिक सहयोग तथा मनोपरामर्श सेवा उपलब्ध गराउँदै आएको मानसिक स्वास्थ्य तथा परामर्श केन्द्र–नेपाल (सिएमसी–नेपाल) को टोल फ्री नम्बर १८१०५०००४०२ मा तीन महिनासम्मको मासिक बिलसमेत निःशुल्क गरिने भएको छ ।

टेलिकमले जिल्ला प्रशासन कार्यालय काठमाडौँको समन्वयमा नेपाल प्रहरी विपद् उद्धार एवम् प्रतिकार्य तालिम केन्द्र र राधास्वामी सत्सङ्ग व्यास नेपाल, सामाखुसी केन्द्रमा राहत सङ्कलन तथा व्यवस्थापनका लागि एक महिनासम्म १०० एमबिपिएस क्षमताको निःशुल्क इन्टरनेट सेवा उपलब्ध गराएको छ । जिल्ला प्रशासन कार्यालय भरतपुरमा रहेको विपद् व्यवस्थापन एकाइका लागि एक वर्षसम्म १०० एमबिपिएस क्षमताको निःशुल्क इन्टरनेट सेवा उपलब्ध गराइएको छ ।

त्यसैगरी, रसुवा बाढीबाट प्रभावित क्षेत्रबाट प्राप्त हुने सूचना, क्षति विवरण, राहत तथा उद्धारसम्बन्धी जानकारी, फिल्ड रिपोर्ट, फोटो तथा भिडियो लगायतका तथ्याङ्क समयमै सङ्कलन तथा प्रवाह गर्न राष्ट्रिय विपद् जोखिम न्यूनीकरण तथा व्यवस्थापन प्राधिकरणलाई एक वर्षका लागि उच्च गतिको निःशुल्क इन्टरनेट तथा प्राविधिक सहयोग उपलब्ध गराइएको छ ।

कम्पनीले बाढी प्रभावित क्षेत्रको राहत, उद्धार तथा पुनःस्थापनाका लागि कर्मचारीको योगदानसहित विभिन्न शीर्षकमा यसअघि करिब रु २० करोड सहयोग उपलब्ध गराइसकेको छ । बाढीका कारण दूरसञ्चार पूर्वाधारमा करोडौँ रुपैयाँ बराबरको क्षति पुगेकामा क्षतिग्रस्त संरचनाको पुनर्निर्माण तथा सेवा पुनःस्थापनाको कामसमेत निरन्तर भइरहेको टेलिकमले जनाएको छ । रासस