काठमाडौं । सिनेमा ‘पेन्सन पट्टा’ प्रदर्शनको १२औँ दिनसम्म आइपुग्दा निर्देशक तथा लेखक माओत्से गुरुङ आफैँ दर्शक भेट्न देश दौडाहमा निस्किएका छन् । सिनेमाका कुनै पनि कलाकारलाई साथमा नलिई उनी अहिले एक्लै ‘पेन्सन पट्टा’ को प्रमोसनल टुरमा छन् ।तनहुँको दमौलीबाट सुरु भएको माओत्सेको यात्रा चितवन, बुटवल हुँदै धरानसम्म पुगेको छ । अब उनी इटहरी, बिर्तामोड, दमक लगायतका शहरमा पुगेर सिनेमा हेर्ने दर्शक र स्थानीयसँग प्रत्यक्ष भेटघाट गर्दै प्रतिक्रिया लिने तयारीमा छन् ।

दमौली, चितवन र बुटवलमा उनले हलमै पुगेर दर्शकसँग साक्षात्कार गरिसकेका छन् । यी शहरमा ‘पेन्सन पट्टा’ प्रति दर्शकको उल्लेखनीय सहभागिता देखिएको छ। दोस्रो सातामा पनि विभिन्न हलमा सिनेमाका शो थपिएका छन् । कतिपय दर्शकले सिनेमा पाँच पटकसम्म हेरेको प्रतिक्रिया समेत पाइएको माओत्से बताउँछन् । किशोर–किशोरीदेखि वृद्धवृद्धासम्मका दर्शक सिनेमाप्रति आकर्षित भएको उनको अनुभव छ ।

माओत्सेको देश दौडाहाको अर्को रोचक पक्ष भनेको हललाई कुनै पूर्वजानकारी नदिई उनी एक्कासी हलपुग्नु हो । उनी हलमा पुग्दा व्यवस्थापकदेखि कर्मचारीसम्म अचम्मित हुने गरेका छन् । सामान्यतया कलाकार तथा सिनेकर्मी हल भ्रमणमा आउँदा पूर्वजानकारी हुने भए पनि माओत्से भने कुनै औपचारिक जानकारीबिना सिधैं हलमा पुगेर दर्शकसँग भेटिरहेका छन् ।

यसको कारणबारे माओत्से भन्छन्, ‘म आफूलाई सामान्य मान्छे ठान्छु । त्यसैले दर्शकसँग भेट्न कुनै ठूलो तयारी र औपचारिकता आवश्यक ठानिनँ । हलमा पुग्ने, दर्शक भेट्ने र उनीहरूको प्रतिक्रिया सुन्ने हो । हललाई अगाडि नै जानकारी गराउँदा पनि के फरक पर्छ र ?’ उनी सिनेमा चलाउन कलाकारको ठूलो टोली लिएर देश दौडाहमा निस्कनुपर्छ भन्ने सोचबाट आफू टाढा छन् । ‘पेन्सन पट्टा’ ले दर्शकको साथ पाएपछि सामाजिक सञ्जालमा आएका प्रतिक्रिया र दर्शककै आग्रहको आधारमा आफू देश दौडाहमा निस्किएको उनको भनाइ छ ।

‘सिनेमा रिलिजअघि कलाकार बोकेर प्रचारमा हिँड्नेभन्दा रिलिजपछि दर्शकले के भनिरहेका छन्, कहाँबाट बोलाइरहेका छन् भन्ने कुरा महत्त्वपूर्ण लाग्यो । सामाजिक सञ्जालमा दर्शकका प्रतिक्रिया आउन थाले, विभिन्न ठाउँबाट भेट्न आउन आग्रह हुन थाल्यो । त्यसपछि एक्लै हिँड्ने निर्णय गरेँ,’ निर्देशक माओत्सेले भने ।

माओत्सेका अनुसार दर्शकसँग प्रत्यक्ष भेट्दा सामाजिक सञ्जालमा आउने प्रतिक्रियाभन्दा फरक अनुभूति हुन्छ । हलमा बसेर सिनेमा हेरेर बाहिर निस्किएका दर्शकले कथाका पात्र, सम्बन्ध, परिवार र सिनेमाले उठाएको विषयबारे गर्ने प्रत्यक्ष प्रतिक्रिया आफूका लागि महत्त्वपूर्ण रहेको उनी बताउँछन् ।

‘पेन्सन पट्टा’ ले प्रदर्शनको १२ औँ दिनसम्म देशभरबाट दर्शकको राम्रो साथ पाइरहेको छ । दोस्रो सातामा पनि विभिन्न शहरका हलमा शो थपिनु, दर्शक दोहोरिएर सिनेमा हेर्न पुग्नु र किशोरदेखि वृद्ध पुस्तासम्मका दर्शकको सहभागिता देखिनुले सिनेमाप्रतिको दर्शक आकर्षणलाई थप बल दिएको छ । कलाकारको ठूलो टोलीभन्दा निर्देशक आफैँ दर्शकको बीचमा पुगेर सिनेमाको प्रतिक्रिया सुन्ने शैली अहिले ‘पेन्सन पट्टा’ को प्रमोसनल यात्राको फरक दृश्य बनेको छ ।