चितवन । भरतपुर महानगरपालिका–२० रानीपोखरी मिलडाँडाकी १४ वर्षीया सुजिना गुरुङ बेपत्ता भएकी छन् । किरण अमरजंग गुरुङ माध्यमिक विद्यालयमा कक्षा १० मा अध्ययनरत सुजिना बिहीबार बिहान करिब साढे ९ बजे विद्यालय जान घरबाट निस्किएकी थिइन् ।
छोरी विद्यालय नपुगेको जानकारी उनका अभिभावकले दिउँसो २ देखि ३ बजेको बीचमा विद्यालयबाट फोन आएपछि पाएका थिए । विद्यालयको पोसाक लगाएर घरबाट निस्किएकी सुजिनाको झोलामा किताब हुनुपर्ने ठाउँमा अन्य कपडा रहेको पाइएको परिवारले जनाएको छ । छोरी बेपत्ता भएको जानकारी पाएपछि परिवारले खोजी गर्ने क्रममा विद्यालय नजिकैको बाँसको झाडीमा उनका कपडा फेला पारेको बताइएको छ ।
बेपत्ता भएको दोस्रो दिन शुक्रबार पनि सुजिनाको अवस्था अज्ञात रहेको छ । छोरीको खोजी गरिदिन आग्रह गर्दै उनका बुवाआमा जिल्ला प्रहरी कार्यालय भरतपुर पुगेका छन् । परिवारले सुजिनाको खोजीमा सहयोग गरिदिन सबैसँग अपिल गरेको छ ।