भरतपुर। तनहुँको देवघाट गाउँपालिका–४, जोलेआप घर भई हाल चितवनको भरतपुर महानगरपालिका–२०, रानीपोखरी मिलडाँडामा बसोबास गर्दै आएका मानबहादुर गुरुङ र धनसरी गुरुङकी १४ वर्षीया छोरी सुजिना गुरुङ तीन दिनपछि परिवारको सम्पर्कमा आएकी छन्। रानीपोखरीस्थित श्री किरण अमरजंग गुरुङ माध्यमिक विद्यालयमा कक्षा १० मा अध्ययनरत सुजिना बिहीबार बिहान करिब ९ः३० बजे विद्यालय जान घरबाट निस्किएकी थिइन्। तर उनी विद्यालय नपुगेपछि परिवारले खोजी सुरु गरेको थियो। छोरी विद्यालय नपुगेको जानकारी अभिभावकले बिहीबार दिउँसो करिब २ देखि ३ बजेको समयमा विद्यालयबाट फोन आएपछि थाहा पाएका थिए।
विद्यालयको पोसाक लगाएर घरबाट निस्किएकी सुजिनाको झोलामा किताबको सट्टा अन्य कपडा रहेको पाइएको परिवारले जनाएको थियो। खोजी गर्ने क्रममा विद्यालय नजिकैको बाँसको झाडीमा उनका झोला र कपडासमेत फेला परेको बताइएको थियो। छोरी बेपत्ता भएपछि अभिभावकले खोजीका लागि सहयोग गरिदिन जिल्ला प्रहरी कार्यालय चितवन तथा इच्छाकामना न्युजलाई आग्रह गरेका थिए। यसैबीच, बेपत्ता भएको तेस्रो दिन आज शनिबार बिहान करिब ८ बजेको समयमा भरतपुर महानगरपालिका–१, ठिमुरामा सुजिना फेला परेकी हुन्। उनी शुक्रबार साँझ नै ठिमुरामा नजिकैको एक चौतारी बसिरहेको अवस्थामा त्यहिको सानानानीहरूले देखेर घरमा लगेर राखिएको थियोे ।
ठिमुरा निवासी निर्मल गुरुङले आफ्नो घरनजिकैको छिमेकीको घरमा अपरिचित बालिका आएको थाहा पाएपछि बेपत्ता सुजिनासम्बन्धी इच्छाकामना न्युजमा प्रकाशित समाचारसँग उनको अवस्था मिल्दोजुल्दो देखेका थिए। त्यसपछि उनले इच्छाकामना न्युजलाई जानकारी गराएका थिए। जानकारी प्राप्त भएपछि इच्छाकामना न्युजकी संवाददाता करिष्मा गुरुङ स्वयं घटनास्थलमा पुगेर सुजिनालाई भेटेकी थिइन्।
त्यसपछि शनिबार बिहान ठीक १० बजे उनलाई परिवारको जिम्मा लगाइएको हो। छोरी सकुशल फेला परेपछि सुजिनाका बुवाआमाले उनको खोजीमा सहयोग गर्ने,सूचना उपलब्ध गराउने तथा समाचार सम्प्रेषण गर्ने इच्छाकामना न्युजलाई धन्यवाद व्यक्त गरेका छन्।