भारतबाट नेपाल फर्कनेहरूको सङ्ख्या बढ्यो

सिआईएन

१६, चैत्र २०७७

काठमाण्डौ, १६ चैत । पछिल्लो समय कोरोना सङ्क्रमण तीव्र रूपमा बढ्दै गइरहेको एकातर्फ छ भने भारतबाट नेपालीहरू स्वदेश फर्कने क्रम पनि बढेको छ । कैलालीको गौरीफन्टा, कञ्चनपुरको गड्डाचौकी र रुपन्देहीको बेलहीया तथा बाँकेको जमुनाह नाकाबाट दैनिक धेरै सङ्ख्यामा नेपाली घर फर्किरहेका छन् ।

सङ्क्रमण अत्यधिक रहेको भारतबाट यसपटक पनि विना परीक्षण स्वदेश भित्रिदा फेरि सङ्क्रमण बढ्ने खतरा देखिएको छ । केहीदिन अघिसम्म गौरीफन्टा नाकाबाट दैनिक तीन सय नेपाली स्वदेश फर्किने गरेका थिए तर एकसाता यता भने यो सङ्ख्या दोब्बरले बढेको छ ।

अन्य नाकाको अवस्था पनि यस्तै छ । तर, स्वास्थ्य सावधानीका लागि परीक्षण तथा सावधानी अपनाइएको छैन । सङ्क्रमणको जोखिम अत्याधिक रहेकै बेला लुम्बिनी प्रदेश अन्तर्गतका नाकामा बिना परीक्षण स्वदेश फर्किनेको लर्को रहेको स्थानीयबासीको भनाइ छ । भारतमा कोरोनाको लहर फेरि तीव्र भएसँगै त्यहाँ पूगेका नेपाली धमाधम घर फर्किरहेका छन् ।

लुम्बिनी प्रदेशको सामाजिक विकास मन्त्री सुदर्शन बरालले सावधानी अपनाउने, सीमा नाकामा जाँचमा पनि कडाइ गरिएको सीआइएनसँग बताउनुभयो । सुदूरपश्चिमको सामाजिक विकास मन्त्रालयले भारतमा दोस्रो लहर देखिए लगतै प्रदेशका चार वटै नाकामा स्वास्थ्य परीक्षण गरेर नेपाल भित्रन दिइएको जनाएको छ ।

सीआइएनसँग कुराकानी गर्दै सामाजिक विकास मन्त्री कृष्णराज सुवेदीले आत्तिइहाल्नु पर्ने अवस्था नरहेको सीआईएनसँग बताउनुभयो ।