घैरुङ, ९ असार । गोरखाको शहीदलखन गाउँपालिकाले आर्थिक वर्ष २०७८÷०७९ का लागि ६१ करोड ५९ लाख रुपैयाँ बजेट प्रस्तुत गरेको छ । नवौँ गाउँसभा तथा बजेट अधिवेशनमा उपाध्यक्ष इन्दिरा तिवारीले बजेट र नीति तथा कार्यक्रम गाउँपालिका अध्यक्ष रमेशबाबु थापाले प्रस्तुत गरेका हुन् ।

गाउँपालिकाले पूर्वाधार तर्फ संघीय सरकारसँगको साझेदारीमा देउराली ओयाक रानीस्वाँरा तीनघरले चिसापानी तीनमाने सडक स्तरोन्नतिका लागि दुई करोड आठ लाख रुपैयाँ बिनियोजन गरेको छ ।

गाउँपालिकाको प्रशासकीय भबनका लागि दुई करोड, वडा नम्बर १ र ९ को नयाँ भबन निर्माणका लागि बजेट बिनियोजन गरिएको गाउँपालिकाका प्रमुख प्रशासकीय अधिकृत जीवनबहादुर आलेले बताए । ती दुईवटा वडामा भबन बनेपछि शहीदलखन गाउँपालिका भित्रका सबै वडामा नयाँ भबन हुने उनले बताए ।

सबै वडाका एक/एक वटा मूख्य सडकलाई गौरबको योजनाका रुपमा बजेट बिनियोजन गरिएको छ । शहीदलखन किल्ला चुलेभीर भ्यूपार्क, मनकामना केबलकारको माथिल्लो चेरेसदेखि मन्दिरसम्म ढुङ्गा बिछ्याउने कार्यक्रम रहेको प्रमुख प्रशासकीय अधिकृत आलेले बताए ।
गाउँपालिकाले गणीत सुधार वर्षको रुपमा विद्यालयहरुमा अतिरिक्त कक्षा संचालन गर्ने र शिक्षकलाई प्रोत्साहन गर्ने भएको छ ।

जेष्ठ नागरिकको घरघरमा स्वास्थ्य जाँच, गर्भवती महिलाको स्थानीय स्वास्थ्य संस्थामा भिडियो एक्सरे सेवा दिने नीति गाउँपालिकाले लिएको छ । कम्तिमा एउटा स्वास्थ्य संस्थाबाट फार्मेसी सेवा सुरु गर्ने, २४ सै घण्टा सेवा दिने रणनीति बनाउने योजना रहेको प्रमुख प्रशासकीय अधिकृत आलेले बताए ।

शहीदलखन गाउँपालिकाले रासायनिक मलमा अनुदान, ब्यवशायिक रुपमा जग्गा भाडामा लिई खेती गर्ने किसानलाई जग्गाभाडामा २५ प्रतिशत अनुदान, रैथाने बाली संरक्षण कार्यक्रम, वडा नम्बर ६ र ९ मा भैँसी पालक पकेट कार्यक्रम संचालन गर्ने निर्णय गरेको छ ।

ह्याचरी सुरु गर्ने सहकारीलाई अनुदान दिने, लक्षित बर्गको क्षमता अभिवृद्धि, महिला बिकास र सामाजिक बिकासको क्षेत्रमा पनि गाउँसभाले बजेट बिनियोजन गरेको छ ।

गाउँपालिकाका अध्यक्ष रमेश थापामगरको अध्यक्षतामा भएको कार्यक्रममा उपाध्यक्ष इन्दिरा तिवारी, प्रमुख प्रशासकीय अधिकृत जीवनबहादुर आले मगर, वडा अध्यक्षहरु, कार्यपालिका सदस्यहरुको उपस्थिति रहेको थियो ।