स्नेहा कर्ण, काठमाडौँ, १२ फागुन । एक साता अघि मात्रै, विश्व स्वास्थ्य सङ्गठनले कोरोनाको नयाँ स्वरुप आउन सक्ने बताएपनि नयाँ स्वरुप कस्तो हुनेबारे भन्न नसकिने डब्लुएचओले जनाएको छ । फेरि आउन सक्ने कोरोनाको नयाँ स्वरुप कति खतरनाक हुन्छ र कुन उमेर समुहलाई प्रभावित बनाउँछ भन्ने बारेमा अहिले नै थाहा नहुने भएको हो । 

कोरोनाको जोखिम लामो समय रहिरहने भएकाले सावधानी अपनाइरहन डा. प्रज्ववल श्रेष्ठको सुझाव छ । कोरोनको पछिल्लो स्वरुप ओमिक्रोनको असर केही कम भइसकेपछि अब यसको नयाँ स्वरुपबारे सबैको चासोको विषय बनेको छ वैज्ञानिकहरू अझै पनि कोरोनाबारे अध्ययनमा नै छन् । सुरुदेखि नै यसको स्वरुप र प्रभाव एकै किसिमको नभएकाले पनि तत्कालै केही भन्न सक्ने अवस्था नरहेको डाक्टरहरू बताउँछन् ।

कोरोना महामारी सुरु हुँदा देखिएका स्वास्थ्य समस्या नयाँ स्वरुप फेला परेसँगै परिवर्तन भएका थिए । सुरुमा कोरोनाले दीर्घरोगीलाई मात्रै समस्या गराएको थियो भने डेल्टासहितका स्वरुपले सबै उमेर समूहलाई प्रभावित बनाएको थियो । 

पछिल्लो समय फेला परेको ओमिक्रोनको जोखिम डेल्टाभन्दा कम देखिएको भएपनि यसलाइ कमजोर मान्न नहुने र नयाँ स्वरुपको जोखिम पनि कायमै रहेको सङ्क्रामक रोग विशेषज्ञ डा.जनक कोइरालाको भनाइ छ । विज्ञहरू स्वाइन फ्लू, इन्फ्लूएन्जा, स्क्रब टाइफस, डेङ्गी, मलेरिया लगायत सङ्क्रामक रोगको जोखिम पनि सँधै कायमै रहेकाले कोरोनाको जोखिम पनि कायमै रहने अनुमान गर्छन् । 

आगामी दिनमा कोरोनाको स्वरुप कस्तो देखिन्छ भन्ने एकिन नभएपनि जनस्वास्थ्यका मापदण्डलाई दैनिक बानी व्यवहारमा उर्तान डाक्टरहरूको सुझाव छ ।