काठमाण्डौ, २४ चैत । सत्तारुढ दलहरूको निर्वाचन तयारी तथा गठबन्धन समितिले चुनावी तालमेलबारे २ दिन भित्र निर्णय लिइसक्न जिल्लास्तरीय संयन्त्रलाई निर्देशन दिएको छ । नेपाली काँग्रेसका वरिष्ठ नेता रामचन्द्र पौडेलको नेतृत्वमा बसेको समितिको बैठकमा चुनावी तालमेल गरेर २२ गते अर्थात मङ्गलवारसम्म वस्तुस्थिति मुल्याङ्कन गर्न भनेअनुसार काम भए नभएको समीक्षा पनि भएको छ ।

धेरैजसो जिल्लामा तालमेलबारेमा छलफल र निर्णय भएको भएपनि कतिपय जिल्लामा भने यसबारेमा निर्णय भइसकेको छैन । अब २ दिन अर्थात् शनिवारसम्म जिल्लाको स्थिति र कसरी जाने भनेर निर्णय गरेर साझा रुपमा पठाउन हिजोको बैठकले निर्देशन दिएको हो । गठबन्धनको चुनाव तयारी तथा अनुगमन गर्न गठित समितिको बैठक आउँदो आइतवार फेरि बस्ने छ ।

चुनाव आउन अब ३६ दिन मात्रै बाँकी रहँदा सत्ता गठबन्धनमा चुनावी तालमेलको चटारो देखिएको छ । तर महानगर तथा उपमहानगरमा भने कसले कति सङ्ख्या लिने भन्नेमा कुरो टुङ्ग्याउन चुनौतीपूर्ण हुने देखिएको छ । सत्ता गठबन्धनका नेताहरू चुनावी तालमेलको लागि दौडधुपमा लागेको भएपनि नेकपा एमालेले भने एक्लै चुनावी मैदानमा होमिने बताउँदै आएको छ । ५ दलिय गठबन्धनका अघि एमाले एक्लै चुनामा गएर जित हासिल गर्ने दाबी अध्यक्ष केपी शर्मा ओलीले गर्दै आउनुभएको छ ।

यद्यपी एमालेले राप्रपा तथा लोसपा सँग पनि चुनाबी तालमेल गर्ने प्रयास भने गरिरहेको छ । नेकपा माओवादी केन्द्रका अध्यक्ष पुष्पकमल दाहाल प्रचण्डले संघीय लोकतान्त्रिक गणतन्त्र जोगाउन फेरि एक पटक लड्नुको विकल्प नभएको र त्यसका लागि आगामी निर्वाचन माओवादी केन्द्रले जित्नुपर्ने बताउनुभएको छ । हिजो चितवनमा पार्टी प्रवेश कार्यक्रमलाई सम्बोधन गर्दै माओवादी अध्यक्ष प्रचण्डले सोही तयारी र काम गर्न कार्यकर्ताहरूलाई निर्देशन दिनुभएको छ ।