उषा तामाङ, काठमाडाँै, ५ जेठ । सवारी साधन अनुमति पत्र लाइसेन्स लिन चाहनेहरू अत्यधिक भएपछि यातायात व्यवस्था विभागले दु्रत गतिमा लाइसेन्स दिने तयारी गरेको छ । हाल लाइसेन्सका लागि आवेदन दिएकाहरूको परीक्षा मिति सन् २०२४ अर्थात अबको २ वर्षसम्म हुनेगरि पुगेपछि हालको लागि आवेदन प्रक्रिया बन्द भएको छ । कोरोना भाइरसका कारण २०७६ चैतदेखि सरकारले नयाँ चालक अनुमतिपत्रको आवेदन लिने काम स्थगित गरेको थियो ।

त्यसयता विभिन्न समयमा आवेदन फारम खुल्दै तथा बन्द हुँदै आएको छ । गत चैत १ बाट आवेदन फारम भर्ने प्रक्रिया नै बन्द भएपछि लाइसेन्स लिन चाहनेहरू समस्यामा परेका छन् । चालक अनुमतिपत्र लिन चाहनेहरूको सङ्ख्या अत्यधिक बढेपछि विभागले पहिले आवेदन दिएकाहरूलाई लाइसेन्स वितरण गर्ने र त्यसपछि नयाँ प्रक्रिया सुरू गर्ने तयारी गरेको थियो ।

आवेदन दिएकाहरूको परीक्षा बैशाख ३० भित्रै गरिसक्ने भनिएको भएपनि त्यसो हुन सकेको छैन । अब पनि दु्रत गतिमा १५ दिनमा नै लाइसेन्स पाईएला भन्नेमा नागरिकलाइ विश्वास छैन । अहिलेसम्म लाइसेन्सको आवेदन दिएकाहरूको पालो सन् २०२४ नोभेम्बर सम्म तोकिएको छ । पुर्वाधार र जनशक्तिको अभावमा तत्कालै परीक्षा गराउन सम्भव भएको छैन, जसका कारण सरकारको यो लक्ष्य पूरा हुनेमा शंका छ ।

यातयात व्यवस्था विभागका अनुसार सन् २०२१ सम्मका सबै सवारी चालक अनुमति पत्र छपाइ गरि सम्बन्धित यातयात व्यवस्था कार्यालय पठाइसकिएको छ । बाँकी रहेका करिव ९० हजार लाइसेन्स छपाइको काम सम्पन्न गर्न अहिले दैनिक ४ देखि ६ हजारसम्म छपाइ भइरहेको छ । त्यसैले अब आवेदन दिएको १५ दिनभित्र लिखित र ट्रायल परीक्षा दिन पाउनेगरि व्यवस्था गर्न सकिने विभागका सूचना अधिकारी इश्वरी दत्त पनेरु दाबी गर्नुहुन्छ ।

अहिले विभाग र विभिन्न प्रदेश अन्तरगत रहेका २६ कार्यालय पुराना आवेदकको लिखित परीक्षा, प्रयोगात्मक परीक्षा (ट्रायल), लाइसेन्स छपाइ र वितरणमा केन्द्रीत छन् । तर पनि पुराना आवेदनको प्रक्रिया समयमा नै नटुङ्गिदा दु्रत गतिमा लाइसेन्स वितरण गर्ने विभागको योजना कार्यान्वयनमा चुनौती छ ।