काठमाडौं, १० पुस । नेपाल कम्युनिष्ट पार्टी (नेकपा) प्रचण्ड–नेपाल समूहले अझै महासचिव टुंग्याउन सकेको छैन । विहीबार बसेको स्थायी समिति बैठकपछि महासचिव बनाउने विषयमा विवाद सिर्जना भएको छ ।

प्रचण्ड–नेपाल समूहमा महासचिवका लागि आकांक्षी धेरै हुँदा विवाद भएको हो । विवाद हुँदा महासचिव टुंगो लाग्न सकेन । बिहीबार बसेको केन्द्रीय समिति बैठकबाट अनुमोदन गराउने गरी प्रक्रिया अघि बढाएपनि विवादपछि महासचिवको टुंगो लाग्न नसकेको हो ।

बिहीबार विहान सिनामंगलमा बसेको नेताहरुको अनौपचारिक छलफलले सुरेन्द्र पाण्डेलाई महासचिव बनाउने सहमतिपछि पेरिसडाँडामा सचिवालय बैठक बसेका थिए । सो बैठकले पनि पाण्डेलाई नै महासचिव बनाउने प्रस्ताव स्थायी समितिमा पेश गरेको थियो ।

स्थायी समितिमा भने त्यस विषयमा विवाद भएको थियो । स्थायी समितिमा रहेका नेताहरुबीचमै आकांक्षा बढी देखिएपछि निर्णयमा पुग्न सकेन ।

स्थायी समितिको बैठकमा विवाद भएपछि केन्द्रीय समिति बैठकको महासचिव अनुमोदन गर्ने प्रस्ताव हटाइएको थियो ।

महासचिवको आकांक्षा राख्नेमध्येमा हरिबोल गजुरेल पनि एक हुन् । आकांक्षीमध्ये गजुरेल वरिष्ठ भएकाले पनि उनलाई बनाउनुपर्ने एक पक्षको दावी छ । उनले पनि आफूले महासचिवको जिम्मेवारी पाउनुपर्ने दावी नेताहरुसँग राखेको स्रोतको भनाइ छ ।

त्यस्तै, वर्षमान पुन, घनश्याम भुसाल, जनार्दन शर्मा लगायतका नेताहरुको पनि महासचिवमा दावी छ ।

आकांक्षी नेताहरु बढेकाले तत्काललाई महासचिवको टुंगो नलगाई अघि बढ्ने निधो गरिएको एक नेताले बताए । अहिले आन्दोलन गर्नुपर्ने बेला भएकाले महासचिवको विवादतिर नलाग्ने निचोड नेताहरुको छ । महासचिवको विवाद चर्कँदा आन्दोलन कमजोर हुने निष्कर्षका साथ तत्काल अध्यक्षद्वय पुष्पकमल दाहाल प्रचण्ड र माधवकुमार नेपालले पछि निर्णय लिने नेताहरुलाई बताएका छन् ।