कुरिनटार । चितवनको इच्छाकामना गाउँपालिकाले छिट्टै संचालनमा ल्याउन लागेको इच्छाकामना अस्पतालका लागि स्वास्थ्य सामाग्री जुट्दै गएको छ । इच्छाकामना गाउँपालिकाको विशेष आग्रहमा नेपाल कम्युनिष्ट पार्टी एकिकृत समाजवादीका जिल्ला नेता नरेन्द्र कङ्दङ्वा सहितको टोलीले स्वास्थ्य तथा जनसंख्या मन्त्री भवानी खापुङसँग केहिदिन पहिले भेटवार्ता गरेको थियो।

सोहि भेटवार्ता पश्चात मन्त्री खापुङ आपैmले इच्छाकामना गाउँपालिकाको लागि विशेष सक्रियता देखाई तत्काल इच्छाकामना अस्पतालका लागि आवश्यक स्वास्थ्य सामाग्रीको व्यवस्था गरि पठाउन मातहतका कर्मचारीलाई निर्देशन दिएका थिए।

मन्त्रीको निर्देशन सँगै पहिलो चरणमा इच्छाकामना अस्पतालको लागि सोमबार मात्रै झण्डै ५० लाख बराबरको स्वास्थ्य सामाग्री गाउँपालिकामा आईपुगेको थियो। जसमा साढे ३६ लाख मुल्य बराबरको नयाँ डिजिटल एक्स–रे मेसिन, बेड, मोनिटर र केहि औषधीहरु रहेको गाउँपालिका अध्यक्ष दान बहादुर गुरुङले जानकारी दिए।

अध्यक्ष गुरुङका अनुसार नेता कङ्दङ्वा र मन्त्री खापुङको पहलमा अस्पतालको लागि आवश्यक अन्य स्वास्थ्य सामाग्री आउने तयारीमा रहेको छ भने मन्त्रालयबाटै चिकित्सकको समेत व्यवस्था गर्ने तयारी भैरहेको छ।

पछिल्लो समय गाउँपालिकाले सबैपक्षसँगको सहयोगमा इच्छाकामना अस्पताल संचालनका लागि तिव्र तयारी गरिरहेको छ। गाउँपालिकाले भदौ मसान्त भित्रमा चिकित्सकको नियुक्ती गरि आवश्यक प्रक्रिया पु¥याई १५ बेडको इच्छाकामना अस्पताल संचालन गर्न लागेको अध्यक्ष गुरुङले बताए।

सुरुवातमा हाल गाउँपालिका प्राङ्गणमा रहेको दारेचोक स्वास्थ्य चौकीको भवन र सँगै निर्माण गरिएको संरचनामा अस्थायी रुपमा अस्पतालको सेवा संचालन गरिनेछ भने अस्पतालको छुट्टै नयाँ भवन निर्माण भएपछि स्थायी रुपमा सेवा संचालन गरिनेछ । 

यस्तै मन्त्री खापुङको निर्देशनमा इच्छाकामना गाउँपालिकालाई मोबाईल भिडियो एक्स–रे मेसिन समेत केहि समय पहिले उपलब्ध भएको गाउँपालिकाका स्वास्थ्य शाखा प्रमुख बासुदेव सापकोटाले बताए। सोही मेसिनले अहिले गाउँ टोलमै पुगेर स्वास्थ्यकर्मीहरुले गर्भवती महिलाहरुको स्वास्थ्य परीक्षण गर्ने काम गरिरहेको उनले बताए।