नवलपुर । विशेषज्ञ स्वास्थ्य सेवा बाट वञ्चित ग्रामीण क्षेत्रका नागरिकलाई लक्षित गर्दै आायोजित दुईदिने निःशुल्क स्वास्थ्य शिविर सम्पन्न गरिएको छ । बुलिङटार गाउँपालिका वडा नं. ३ को भलायटार, गैरी, खसुवाटार माथिल्लो र तल्लो सिंगुवा,धारापानी, नयाँ गाँउमा उक्त शिविर सम्पन्न गरिएको हो । शुक्रबार र शनिबार सम्पन्न शिविरमा ४२० जना लाभान्वित भएका छन ।

गंंगा स्वास्थ्य दर्पण फाउण्डेसन नेपाल र बुलिङटार गाउँपालिकाको संंयुक्त आयोजनामा उक्त शिविर सम्पन्न भएको थियो ।

शिविरमा वरिष्ठ अर्थोपेडिक सर्जन डा.शंकर ढकाल, वरिष्ठ कलेजो रोग विशेषज्ञ डा.रुपेश श्रेष्ठ , डा. अमित श्रेष्ठ लगायतको टिमले हाड्जोर्नी, नशा रोग कलेजो रोग , पेट रोग, उच्च रक्तचाप र मधुमेह रोग बाट प्रभावित ४२० जना बिरामीहरूको स्वास्थ्य परीक्षण साथै सचेतनामुलक कार्यक्रम गरिएको पालिकाका स्वास्थ्य शाखा प्रमुख अशोक कुमार श्रेष्ठले जानकारी दिनुभयो ।

चिकित्सकका अनुसार स्वास्थ्य परीक्षणको क्रममा हड्डी खिईएको विरामी,नशा च्यापिएको,हड्डीको संक्रमण, प्यारालाइसिस, कलेजो रोग,पेट रोग, उच्च रक्तचाप, दम रोग, मधुमेह रोग बाट प्रभावित विरामी देखिएको बताउनु भयो ।

शिविरमा उपचारका लागि आएका विरामीलाई अतिरिक्त उपचारका लागि अस्पताल रिफर गरिएको छ । उनीहरुका लागि गुणस्तरीय सेवा र विशेष छुट प्रदान गर्ने हस्पिटलका अध्यक्ष तथा वरिष्ठ अर्थोपेडिक सर्जन डा.शंकर ढकालले बताउनु भयो ।

कार्यक्रममा डा.शंकर ढकाल र डा.रुपेश श्रेष्ठले सकेसम्म रोग लाग्नै नदिन ध्यान दिनु पर्ने लगायत मानव स्वास्थ्यमा रोगको प्रभाव देखा परेमा अपनाउनु पर्ने विषयमा सहजीकरण गर्नुभएको थियो । यसैगरी पालिकाका प्रमुख प्रशासकीय अधिकृत विशाल मिश्रा, वडा नं. ३ का अध्यक्ष विष्णु विर जर्घामगर, स्वास्थ्य शाखा प्रमुख अशोक कुमार श्रेष्ठ लगायतले चिकित्सकीय टिमलाई धन्यवाद सहित मन्तव्य राख्नुभएको थियो । फाउण्डेसनका अध्यक्ष सन्दिप कुमार श्रेष्ठले शिविर लगायत यस खाले कार्यक्रमलाई आगामी दिनमा निरन्तरता दिँदै जाने प्रतिबद्धता व्यक्त गर्नु भयो ।

शिविरको प्राविधिक सहयोग भरतपुरमा रहेको मनकामना हस्पिटल प्रा लि ले गरेको हो भने स्थानीय संयोजन बुलिङटार जेसीजले गरेको हो ।