गोरखा, ३० श्रावण । तिब्बतको सीमानामा अवस्थित चुमनुब्री गाउँपालिकाको बिहीमा हेपाटाइटिस बी विरुद्धको खोप शिविर सञ्चालन गरिएको छ । गाउँपालिकासंग समन्वय गरी किमोलुङ फाउण्डेशन नेपालले चुमनुब्री ५ को राना खोपकेन्द्रमा शिविर सञ्चालन गरेको हो ।

वडा नं. ४ र ५ का विभिन्न खोपकेन्द्रहरुमा १० दिनसम्म सञ्चालन हुने शिविरको बुधबार प्रदेश जनस्वास्थ्य कार्यालय गोरखाका खोप शाखा प्रमुख नानीबाबु दानी र संस्थाका संस्थापक अध्यक्ष वाङचुक राप्तेन लामाले संयुक्त रुपमा उद्घाटन गरेका हुन् ।
बुधबार पहिलो दिन ५८ जनामा स्कृनिङ गरिएको लामाले जानकारी दिए । ३१ जना महिला र २७ जना पुरुषले सेवा लिएका हुन् । जसमध्य तीनजना (दुई महिला र एक पुरुष)मा हेपाटाइटिस बिको संक्रमण पुष्टि भएको छ ।

बिहीको राना खोप केन्द्रमा संचालित शिविरको पहिलो दिन ४४ जनालाई हेपाटाइटिस बि बिरुद्धको खोप लगाइएको छ । खोप नलगाएका १६ वर्ष मुनिका ११ जनाको परिक्षण गरिएकोमा ३ जनामा संक्रमण पुष्टि भएको शिविरको आयोजक संस्था किमोलुङ फाउन्डेसन नेपालका संस्थापक वाङचुक राप्तेनले बताए ।

चुमनुब्री गाउँपालिका वडा नं ५ का वडाअध्यक्ष काल्देन छेवाङ लामाको अध्यक्षता एवं प्रदेश जनस्वास्थ्य कार्यालयका खोप फोकल पर्शन नानिबाबु दानिको प्रमुख आतिथ्यतामा बुधबार शिविरको औपचारिक रुपमा उद्धघाटन गरिएको थियो ।
बिहीबार बिही स्वास्थ्यचौकीमा खोप शिविर सञ्चालन हुनेछ । त्यस्तै साउन ३० गते क्य्राक गाउँमा, भदौ १ गते सेराङगुम्बामा र ३ गते पुनः बिही गाउँमा छुटेकाहरुलाई खोप लगाइने कार्यक्रम तय भएको छ ।

भदौ ४ गते वडा नं. ४ को छाक–क्वाकको स्वास्थ्य संस्था, ५ गते गाप नुब्री आधारभूत विद्यालाय, ६ र ७ गते प्रोक स्वास्थ्य संस्था, ८ गते नामरुङ ९ लार्केबजार स्वास्थ्या चौकी र ९ गते गप वडा कार्यालयमा हुने जनाएको छ । शिविरमा आउने सबैको स्कृनिङ गर्ने भएता पनि हेपाटाइटिस ‘बी’ बिरुद्धको खोप भने १६ वर्ष उमेर माथिका सबैलाई लगाइने बताए । हेपाटाइटिस ‘बी’ बिरुद्धको खोप तीन डोज लगाउनु पर्ने हुन्छ । पहिलो खोप र दोस्रो खोप एक महिना पछि र अन्तिम खोप ६ महिना पछि लगाउनु पर्ने संस्थाका अध्यक्ष लामाले जानकारी दिए ।

हिमाली तथा उच्च पहाडी भेगका मनिसमा हेपाटाइटिस ‘बी’ को संक्रमण बढि मात्रमा देखिन थालेकाले शिविर गरिएको उनको भनाइ छ । वैदेशिक रोजगारीमा जाने क्रममा गरिने स्वास्थ्य परीक्षणको क्रममा त्यहाँका स्थानीयमा बढी मात्रामा हेपाटाइटिस ‘बी’ को संक्रमण देखिएर रोजगारीमा जान नपाउने गरेको अध्यक्ष लामाले बताए । त्यसको न्यूनीकरण गर्ने उद्देश्यले शिविर आयोजना गरिएको उनले बताए । शिविर बिहान ८ बजेदेखि अपरान्ह ५ बजेसम्म सञ्चालन हुने बताएको छ ।