छिम्केश्वरी–बुढीदेवी महायज्ञको तेस्रो दिन सोमबार सम्म ५० लाख रुपैयाँ दान संकलन

इच्छाकामना न्युज

११, कार्तिक २०८२

छिम्केश्वरी–बुढीदेवी महायज्ञको तेस्रो दिन सोमबार सम्म ५० लाख रुपैयाँ दान संकलन

आँबुखैरेनी (तनहुँ), कात्तिक ११ - तनहुँ जिल्लाको आँबुखैरेनी हाटबजारस्थित पवित्र स्थलमा सञ्चालन भइरहेको छिम्केश्वरी–बुढीदेवी श्रीमद्भागवत सप्ताह ज्ञान महायज्ञमा दानदाताको सहभागिता दिनानुदिन बढ्दै गएको छ। महायज्ञको तेस्रो दिन सोमबारसम्म आइपुग्दा करिब ५० लाख रुपैयाँ आर्थिक दान संकलन भएको आयोजक समितिले जनाएको छ।

महायज्ञका संयोजक कृष्णमान तामाङका अनुसार, यो महायज्ञ छिम्केश्वरी–बुढीदेवी मन्दिर क्षेत्रको धार्मिक, सांस्कृतिक र पर्यटन विकासका लागि आयोजना गरिएको हो। मन्दिर क्षेत्रको समग्र विकासका लागि करिब १० करोड रुपैयाँ संकलन गर्ने लक्ष्य राखिएको र करिब ५० लाख रुपैयाँ खर्च हुने अनुमान गरिएको उनले बताए।

महायज्ञमा प्रसिद्ध वाचन प्रविण पण्डित श्री दिनबन्धु पोखरेलले श्रीमद्भागवत वाचन गर्दै धार्मिक ज्ञानगङ्गा प्रवाह गरिरहेका छन्। महायज्ञ अवधिभर पितृ उद्धार, वैदिक कर्म, धान्याञ्चल, तुलादान, विवाह–ब्रतबन्ध, ग्रहशान्ति पूजनलगायतका धार्मिक क्रियाकलाप सम्पन्न गरिनेछ। साथै तामा, पित्तल, ढोलक, अन्न, खाद्यान्न तथा अन्य धार्मिक सामग्रीको दान पनि स्वीकार गरिने आयोजक समितिले जनाएको छ।

महायज्ञ कात्तिक १५ गतेसम्म सञ्चालन हुने तय गरिएको छ। आयोजक समितिले यस महायज्ञले छिम्केश्वरी–बुढीदेवी मन्दिर क्षेत्रको धार्मिक, सांस्कृतिक र पर्यटन प्रवर्द्धनमा महत्वपूर्ण योगदान पुर्‍याउने विश्वास व्यक्त गरेको छ।