गोरखा, १० पुस । गोरखाको मानवसेवा आश्रमको भवन बनाउन शहिदलखन गाउँपालिकाले पाँच लाख ११ हजार १११ रुपैयाँ प्रदान गरेको छ । आश्रममा आयोजित कार्यक्रममा गाउँपालिका अध्यक्ष रमेश थापा मगरले आश्रम प्रमुख मुना लामालाइ सहयोग रकमको चेक हस्तान्तरण गरेका हुन् ।

चेक हस्तान्तरण कार्यक्रममा बोल्दै गाउँपालिका अध्यक्ष रमेश थापा मगरले भने,’ आमा बाबु वा आफ्ना सहारा नभएका बालबालिकाहरु, सडक बालबालिकाहरुको उद्धार गरी जुन पुनित कार्य मानव सेवा आश्रमले गरिरहेको छ, त्यसलाइ साथ दिन शहिदलखन गाउँपालिकाले सहयोग गरेको हो । मानवसेवा आश्रमले गरेको सह्राननीय कामको पालिका हार्दिक धन्यवाद प्रदान गर्दछ । ‘

पालिकाले यस अघि पनि आश्रमलाइ सहयोग गर्दै आएको र धेरै सहयोग गर्ने पालिकामा शहिदलखन रहेको आश्रम प्रमुख मुना लामाले बताइन । प्रदान गरिएको रकमबाट बन्दै गरेको भवनमा एउटा कोठा शहिदलखन गाउँपालिकाको नामबाट निर्माण गरिने उनको भनाइ छ ।

कार्यक्रममा शहिदलखन गाउँपालिका वडा नम्बर ७ का वडा अध्यक्ष शरण श्रेष्ठले १५ हजार, वडा नम्बर ९ का वडा अध्यक्ष रामप्रसाद लामिछानेले पाँच हजार नगद सहयोग प्रदान गरेका छन् ।

कार्यक्रममा गाउँपालिका प्रमुख प्रशासकीय अधिकृत जीवन बहादुर आले, लेखा अधिकृत सन्तोष लामिछाने, वडा अध्यक्षहरु शरण श्रेष्ठ, काशिनाथ अँगाइ, राम प्रसाद लामिछाने, भवन निर्माण समितिका सँयोजक इश्वरकाजी मास्के, मानवसेवा आश्रमका अविभावक शितलकाजी मास्के, स्याम श्रेष्ठ,नेपाल पत्रकार महासँघ गण्डकी प्रदेशका सचिव कैलाशबाबु श्रेष्ठ, कोषाध्यक्ष राजेन्द्र न्यौपाने लगायतको उपस्थिति रहेको थियो ।

आश्रममा हाल ४३ जना बालगोपालहरु रहेका छन् । देशभरीका १६ जिल्लामा २६ वडा आश्रममा दुइ हजार भन्दा धेरै नागरिकहरु आश्रम लिएर बसेका छन् ।