गोरखा ।  बिगतदेखि इबिडिङ गर्दै आएको गोरखा नगरपालिकाले यसबर्ष सो व्यवस्था हटाएर ढुङ्गा गिटी, बालुवाको ठेक्का आह्वान गर्दा ब्यवशायीले मिलेमतोमा ठेक्का दर्ता गरेका छन् । ईविडिङ नगर्दा ब्यवशायी बिच प्रतिस्पर्धा कम भएको छ ।

मिलेमतोमा ठेक्का लगाउँदा नदीजन्य सामग्री उत्खननबाट नगरपालिकालाई हुने राजस्वमा समेत घाटा हुन्छ । ‘साँघुरो प्रतिस्पर्धा गराएपछि न्यूनतम अंकलाई आधार मानेर ठेक्का हाल्छन्, यसले गर्दा राजस्व त सिधै घट्ने नै भयो, प्रतिस्पर्धा धेरै गराउँदा बढाबढ व्यवस्थाअनुसार नगरपालिकालाई राजस्व बढ्ने थियो’ नगरपालिकाका एक कर्मचारीले भने ।

अनलाईन विडिङ गर्दा वेभसाईटबाट बोलपत्र खरिद गरी दाखिला गर्न सकिन्छ । यो प्रावधान हटाएर टेण्डर आह्वान भएपछि बोलपत्र दाखिला गर्न चाहने निर्माण कम्पनी वा ब्यवशायीले नगरपालिकामै उपस्थित भएर फर्म खरिद र दाखिला गर्नुपर्छ ।

नगरपालिकाले पुस ६ गते जारी गरेको सुचनामा निर्धारित समयभित्र बोलपत्र-दरभाउपत्र फारम राजश्व शाखाबाट खरिद गरी पेश गर्न भनिएको छ । ब्यक्ति उपस्थित भएर खरिद गर्दा कसले, कुन फर्मको नाममा खरिद ग¥यो भन्ने ब्यवशायीले पहिचान गर्छन् र ठेक्का रोक्न, मिलाउनतर्फ लाग्छन् । बिभिन्न १४ वटा घाटको ठेक्का आह्वान गरेको नगरपालिकाले ९ वटा ठेक्काको म्याद पुस २० गते सकिएको छ । बाँकी पाँचवटा माघ ५ गतेसम्म अवधी छ ।

९ वटा घाटको ठेक्का चारदेखि १५ लाख भित्रका छन् । यो मध्ये पाँचवटामा मात्रै ठेक्का दर्ता भयो । दाखिला भएका पाँचवटा ठेक्कामध्य सबैमा मिलेमतो गरेर तीन-तीनवटा कम्पनीको मात्रै दावी छ । कम्तीमा तीनवटा दाखिला गर्नुपर्ने बाध्यकारी कानूनी व्यवस्था पूरा गर्न ब्यवशायीले फर्म पेश गरेका हुन्

दाखिला भएकामध्ये ठेक्का नम्बर ४ दरौँदी नदीको बेनिखोला घाट हो । ६ वटा कम्पनीले फर्म खरिद गरेकोमध्ये त्यहाँ तीनवटाले मात्रै दर्ता गरे ।

मस्र्याङ्दी नदीको नारी घाटका लागि ७ वटा कम्पनीले बोलपत्र खरिद गरेका थिए । ती मध्ये मिलेमतोमा तीनवटा मात्रै दर्ता भएको छ । सोही नदीको शाहा घाटमा ६ वटा कम्पनीले फर्म खरिद गरेर अन्ततः तीनवटा मात्रै दाखिला भएको छ । मस्र्याङदी नदीको जुम्लाङ्ग घाटमा तीनवटा खरिद भएको थियो र तिनवटा दर्ता भएको छ । रामशाह घाटमा तीनवटा फर्म खरिद भएपनि एउटा पनि दाखिला भएन ।

ठूला पाँचवटा ठेक्काको पनि नगरपालिकाले अनलाईन विडिङको ब्यवस्था गरेन । नगरपालिकाका प्रमुख प्रशासकीय अधिकृत ज्ञाननाथ ढकालले इविडिङमा तीन प्रतिशत धरौटी रकम भन्दा माथि इन्ट्री गर्न नमिल्ने भएकाले समस्या भएको बताए । ‘यो ठेक्कामा पाँच प्रतिशत धरौटी नलिई इन्ट्री गर्न मिल्दैन, पाँच प्रतिशत राख्ने ठाउँमा तीन प्रतिशत मात्रै छ’ उनले भने ।
अन्यत्रका नगरपालिकाले भने यो वर्षपनि इविडिङ मार्फत नदीजन्य पदार्थको ठेक्का आह्वान गरिरहेका छन् ।

दरौँदी नदीको बेनिखोला घाट ७२ लाख ३१ हजार सात सय ७० रुपैयाँमा बोलपत्र आह्वान गरिएको छ । अडाईगाउँ घाट र राईपाली घाटमा ४५/४५ लाखमा ठेक्का आह्वान भएको छ । गंगटेखोला घाटको डेक्का ३९ लाख, हात्तिशेरा घाटको ६९ लाख न्यूनतम शुल्क राखेर नगरपालिकाले बोलपत्र आह्वान गरेको छ ।

यी घाटमा पनि ब्यवशायीले सिमित फर्म खरिद गरी दाखिला गर्ने तयारी गरेका छन् । नगरपालिकाले इविडिङ नगराउँदा मिलेमतो गर्न ब्यवशायीलाई सहज भएको छ ।

पुस २० सम्म म्याद रहेका ठेक्का दाखिला भएपनि मूल्याङ्कन र निर्णय हुन बाँकी रहेको गोरखा नगरपालिका राजस्व शाखाका किरण कट्टेलले बताए । बाँकी ६ वटा प्याकेजको ठेक्का माघ ५ गते खोलिँदैछ ।

सार्वजनिक खरिद नियमावलीमा २० लाख भन्दा माथि इविडिङको प्रावधान छ । नदीजन्य पदार्थलाई भने आय ठेक्का भन्दै सार्वजनिक खरिद ऐन आकर्षित नहुने दावी गोरखा नगरपालिकाको छ । यो खरिद प्रक्रिया अन्तरगत नपर्ने भएकाले आय ठेक्कामा इविडिङ गर्नैपर्ने भन्ने प्रावधान नभएको गोरखा नगरपालिका इन्जिनियर प्रकाश ढकालले बताए । ‘गतवर्ष इविडिङ गरेको हो, यो वर्ष गरिएन’ उनले भने । ब्यवशायीको मिलेमतोका बारेमा भने कार्यालयलाई थाहा नहुने उनले बताए । दरौदीं दैनिकबाट