भरतपुर । भरतपुर–१५, रामपुर निवासी वीरलाल तामाङ आबुधाबीमा सम्पर्कविहीन भएका छन्, उनलाई सम्पर्कमा आइदिन आग्रह गरिएको छ ।

पारिवारिक स्रोतका अनुसार वैदेशिक रोजगारका लागि आबुधाबी पुगेका ४२ वर्षीय तामाङ घर आउने तयारीमा थिए । कम्पनीबाट बिदा लिएर घर आउने क्रममा भाइ ३६ दिनदेखि सम्पर्कबाहिर रहेपछि परिवारमा चिन्ता छाएको दाइ दिलबहादुरले चितवन पोष्टलाई बताए ।

भाइको खोजीका लागि वीरलालले काम गरेको कम्पनी र दूतावासलाई समेत पत्राचार गरिसकिएको उनले बताए । दाजु दिलबहादुरका अनुसार २०८० को कात्तिक अन्तिममा बिदामा घर आएर फागुनमा फर्किएका वीरलाल घरमा श्रीमती बिरामी भएपछि भरतपुरको सप्तगण्डकी अस्पतालबाट बिरामीको रिपोर्ट वीरलाल कार्यरत कम्पनीमा पठाएपछि कम्पनीले बिदा दिएको थियो ।

‘श्रीमती बिरामी भएको रिपोर्ट कम्पनीमा इमेल गरेपछि कम्पनीबाट बिदा लिइसकेको भाइ आफ्नै कोठामा लडेर घाइते भएछ । त्यसपछि कम्पनीले नै उपचारका लागि अस्पताल पु¥याएछ’, दिलबहादुरले भने, ‘अस्पतालको आइसियूमा दुई दिन राखेपछि त्यहीँको प्रहरीले थप उपचार र सोधपुछका लागि लिएर गएकोसम्म जानकारी छ । त्यसपछिको अवस्था अज्ञात छ ।’

गत जुलाई ४ तारिख राखी ३ बजे लडेर घाइते भएका वीरलाललाई अस्पतालबाट प्रहरीले लगेपछि त्यहाँ बस्ने नेपालीले पनि खोजीका लागि सक्दो प्रयास गरेका उनको भनाइ छ । वीरलाल सन् २०१९ देखि आबुधाबीस्थित टार्गेट इन्जिनियरिङ कन्स्ट्रक्सन कम्पनीमा स्काफोल्डिङको काम गर्दै आएका थिए ।

भाइको खोजीका लागि वैदेशिक रोजगार विभागलाई पनि पत्र पठाएको, तर साउन २ गते पठाएको पत्रको हालसम्म कुनै प्रतिक्रिया नआएको दाजु दिलबहादुरले जानकारी दिए ।