सर्लाही, २४ साउन । महालेखाका अडिटरहरुले आफ्नो अधिकारको दुरुपयोग गर्दै सरकारी कार्यालयबाटै खुलेआम घुस असुली बढाएका छन् ।  सरकारी खर्च अनुशासन जाँच गर्ने महालेखाका ५ जना अडिटरहरुले लेखापरीक्षणका क्रममा सर्लाहीबाट मात्र करिब रु ५४ लाख घुस असुल गरेका पाइएको छ । 

उनिहरुले सरकारी कार्यालयको लेखापरीक्षणमा अनुचित खर्चको हिसाब मिलान गरि  दिए वापत उनिहरुले सो रकम लिएका खुलेको छ । यस बर्षको लेखापरीक्षणमा जाँदा महालेखाका कर्मचारीहरुले कुन कार्यालयबाट कति घुस लिए भन्ने तथ्यांक सार्वजनिक हुँदा सर्लाहीबाट मात्र करिब रु ५४ लाख घुस रकम बाँडिएको पाइएको हो ।

सरकारी कार्यालयसँगै खुलम खुल्ला घुस असुली गरेर काठमाडौँ फर्किएका महालेखाका अडिटरहरु अन्तिम लेखापरीक्षणको बार्षिक प्रतिवेदन तयार गर्न व्यस्त छन् ।महालेखाले साउन मसान्तसम्म बार्षिक प्रतिवेदन तयार गरेर राष्ट्रपति विद्यादेवी भण्डारीलाई बुझाउने तयारी गरेको छ । 

वाच नेपालको तथ्यांक अनुसार उनीहरुले नगरपालिकाबाट रु ५ लाख र गाउँपालिकाबाट रु २ लाखका दरले घुस बुझेर फर्किएका छन् । सर्लाहीमा बोधराज अर्याल र कृष्ण पौडेल नेतृत्वमा दुई वटा लेखापरीक्षण टोली खटेको थियो ।

यो दुई टोलीले स्थानीय निकायबाट रु २ देखि ५ लाखसम्म घुस लिएर लेखा परीक्षण गरेको पाइएको हो । निर्देशक अर्याल नेतृत्वमा तुलाराम पोखरेल र देवीलाल यादव सहभागी रहेका थिए भने  यो टोलीले बैशाख ३ गतेबाट जिल्ला सदरमुकामको एक होटलमा बसेर कविलासी नगरपालिका, बसबरिया गाउँपालिका, विष्णु गाउँपालिका, हरिपूर्वा नगरपालिका र मलंगवा नगरपालिकाको लेखापरीक्षण गरेको थियो ।

यस्तै निर्देशक कृष्ण पौडेल नेतृत्वको टोलीले १० वटा स्थानीय निकायको लेखापरीक्षण गरेको थियो । सो टोलीले लेखापरीक्षण प्रतिवेदनमा आर्थिक अनियमितता भएको खर्च मिलाएर बेरुजु, असुली कम गरिदिए वापत नगरपालिकाबाट रु ५ लाख र गाउँपालिकाबाट रु २ लाखका दरले घुस रकम संकलन गरेर फर्किएको हो ।

यस्तै जिल्लामा बस्दाको खानपान र बसोबास खर्च पनि स्थानीय निकायले व्यहोरेको छ । सर्लाहीमा ११ नगरपालिका र ९ गाउँपालिका छन् । हरेक स्थानिय निकायहरुमा रकम खर्च पारदर्षी नभएका कारण स्थानिय सरकार त्रासित रहेको थियो । तर केही घुस रकम पनि दिएर भएपनि अडिट मिलाउन सफल भएको स्थानिय सरकार खुसी दंग देखिएको छ ।