गोरखा, २६ साउन । गतहप्ता डुण्डुरे खोला तर्ने क्रममा बेपत्ता भएका आरुघाट गाउँपालिका १ श्यामचेतका सानुकमल गुरुङको दाहिने खुट्टा फेला परेको छ । निर्माणाधीन सोती–मान्बु पक्की पुलमुनि मंगलबार दिउसो सवा १२ बजे गुरुङको खुट्टा भेटिएको प्रहरीले जनाएको छ ।
भेटिएको खुट्टा आफ्ना बाबुको नै रहेको मृतकका छोरा बागबहादुर गुरुङले पुष्टि गरेका छन् । गत साउन १९ गते हलगोरु किनेर गोरु धनीसहित आफ्नो घरतर्फ फर्कने क्रममा उक्त खोलाले बगाई गुरुङ बेपत्ता भएका थिए ।
ईलाका प्रहरी कार्यालय आरुघाट तथा प्रहरी चौकी मान्बुबाट निरन्तर खोजतलास तथा अनुसन्धान कार्य जारी रहेको अबस्थामा पक्की पुल मुनि बुढी गण्डकी नदी किनारमा दाहिने खुट्टा फेला परेको भन्ने सूचना बमोजिम ईलाका प्रहरी कार्यालय आरुघाटबाट प्रहरी अधिकृत समेतको टोली उक्त स्थानमा पुगी अनुसन्धान गरेका थिए ।
प्रहरीले उक्त शरीरको अंग दाहिने खुट्टा आरुचनौटे प्राथमिक स्वास्थ्य केन्द्र आरुघाट ल्याएको छ । दाहिने खुट्टा बाहेकको शरीर फेला नपरेको, खोजतलास कार्य जारी रहेको पनि प्रहरीले जनाएको छ ।