एसवी थापा, सर्लाही, १६ पुस । प्रहरीको भ्यानको ठक्करबाट एक पुरुषको ज्यान गएको विषयलाई लिएर सर्लाहीको बयलबासमा जारी निषेधाज्ञा अझै हटेको छैन । गत मंगलवार दिउँसो ३ बजेबाट जारी निषेधाज्ञा नहट्दा जनजीवन प्रभावित हुन थालेको छ ।
पाँच दिनअघि प्रहरी भ्यानको ठक्करबाट ईश्वरपुर नगरपालिका-५, सखुबनीस्थित खुबलाल टोलका ३० वर्षीय रामकुमार महतोको मृत्यु भएको थियो । घटना शंकास्पद रहेको भन्दै आक्रोशित स्थानीय र बयलवास बजार क्षेत्रका ब्यापारीहरूसमेत आन्दोलित भएका थिए ।
मृतक महतो बयलवास बजार क्षेत्रका फेन्सी पसल सञ्चालकसमेत हुन् । घटनालगतै उग्र बनेका स्थानीय प्रहरी र इलाका प्रहरी कार्यालय केशरगञ्जमा ढुंगामुढा गर्दै तोडफोडमा उत्रिएपछि गत मंगलबारबाट स्थानीय प्रशासनले त्यस क्षेत्रमा निषेधाज्ञा लगाएको थियो । बुधबार दिनभर लालबन्दीस्थित इलाका प्रहरी कार्यालय परिसरमा भएको छलफलबाट ६ बुँदे सहमति भएको थियो ।
स्थानीय प्रशासन र पीडित परिवारबीच भएको छलफल कार्यान्वयन नभएपछि स्थानीय प्रशासनले निषेधाज्ञा जारी राखेको हो । छलफलमा भएको सहमतिअनुसार पीडित परिवारले शव नबुझेपछि शान्ति सुरक्षालाई ध्यानमा राखेर निषेधाज्ञा तेस्रोपटक थप गरिएको जिल्ला प्रशासन कार्यलय सर्लाहीले जनाएको छ । बिहिबार सूचना प्रकाशन गरेर जिल्ला प्रशासन कार्यालयले शुक्रबार साँझ ७ बजेसम्मका लागि निषेधाज्ञा थप गरेको जनाएको छ ।
बुधबार लालबन्दीमा पीडित पक्ष, अन्य सरोकारवाला र सुरक्षा अधिकारीबीच भएको छलफलबाट घटनाको सम्वन्धमा अनुसन्धान गर्न समिति गठन गर्ने, मृतकको परिवारलाई राहतस्वरुप १० लाख रुपैयाँ उपलब्ध गराउन गृह मन्त्रालयमा सिफारिस गर्नेलगायत ६ बुँदे सहमति भएपछि आन्दोलन भने रोकिएको छ । सहमतिअनुसार जिल्ला प्रशासन कार्यालय सर्लाहीले बिहीबार नै पीडित परिवारलाई १० लाख रुपैयाँ राहत उपलब्ध गराइदिन माग गर्दै गृह मन्त्रालयलाई पत्राचार गरेको छ ।
लगातार थपिएको निषेधाज्ञाका कारण बयलवास क्षेत्र सुनसान बनेको छ । बजार क्षेत्रका ब्यापार व्यवसाय बन्द भएपछि उद्योगी व्यापारीहरू मारमा परेका छन् । प्रशासनले निषेधाज्ञा लगाए पनि कुनै पनि बेला झडपका घटना हुन सक्ने आशंकामा स्थानीय त्रसित बनेका छन् ।
निषेधाज्ञाका कारण दैनिक ज्याला मजदुरी गरेर परिवार पाल्ने विपन्न परिवारको बिचल्ली भएको स्थानीय ठेला ब्यवसायी विकाउ साहले बताए । ‘यतिको लामो समय बजार बन्द भएको हामीलाई थाहा थिएन,’ उनले भने, ‘बजार बन्द भएपछि दैनिक ज्यालादारी गरेर गुजारा गर्ने हामी के गर्ने ?’ तथापि घटनाको निष्पक्ष छानविन हुनुपर्ने उनीहरूको माग छ ।
परिवारले शव बुझेन
घटनाको पाँच दिन बितिसक्दा पनि पीडित परिवारले महताेको शव बुझेका छैनन् । महतोको शव अहिले पनि जिल्ला अस्पतालल मंलगवाको शवगृहमा छ । मंगलबार अबेर भएको सहमतिअनुसार शव बुझेर पीडित परिवारले अनुसन्धानमा सहयोग गर्नुपर्ने प्रहरीको भनाइ छ । तर, परिवारजनले सहमति उल्लंघन गरेको उनीहरूका भनाइ छ । प्रहरीका अनुसार गत बुधबार भएको सहमतिपछि बिहीबार मृतकका परिवार शव बुझ्न भनेर मलंगवा पुगेका थिए । तर, पछि त्यसै फर्किएका छन् । मृतकका परिवार चालकविरुद्ध जाहेरी दिन र शव बुझ्न भनेर आए पनि पछि अचानक त्यसै फर्किएकाे जिल्ला प्रहरी कार्यालय सर्लाहीले जनाएको छ ।
विभिन्न प्रहरी युनिट तथा प्रदेश प्रहरी कार्यालय जनकपुरबाट समेत थप मद्दतमा ल्याएका प्रहरीहरूको कठ्यांग्रिदो चिसोमा बिजोग हुन थालेको छ ।बिहीबार मात्रै बयलवास घटनाबारे छानबिन गर्न प्रदेश प्रहरी कार्यालयले समिति गठन गरिसकेको छ ।
प्रदेश प्रहरी कार्यालय जनकपुरले २ नं. प्रदेश दंगा नियन्त्रण प्रहरी गण ढल्केबर, धनुषाका प्रहरी उपरीक्षक (एसपी) ज्ञानेन्द्रप्रसाद फुँयालको नेतृत्वमा प्रदेश २ ट्राफिक प्रहरी कार्यालय पथलैया, बाराका प्रहरी नायब उपरीक्षक (डीएसपी) सन्तुलाल प्रसाद जैसवार, प्रदेश २ प्रहरी कार्यालय जनकपुरधाम, धनुषाका प्रहरी निरीक्षक (इन्सपेक्टर) गोविन्दलाल कर्ण, सोही कार्यालयमा कार्यरत प्रहरी नायब निरीक्षक (सइ) प्रेमकुमार साह र संघीय प्रहरी एकाइ कार्यालय जनकपुरधाम, धनुषामा कार्यरत प्रहरी हवल्दार प्रमोदकुमार साह सहित पाँच सदस्यीय छानबिन समिति गठन गरेको हो ।
प्रहरीका अनुसार गत आइतबार राति ९ बजेतिर ईश्वरपुर नगरपालिका-७, स्थित नगरपालिका कार्यालय नजिकै गस्तीमा रहेको इलाका प्रहरी कार्यालय केशरगञ्ज, बयलबासको भ्यानले ठक्कर दिँदा ना४३प ५०१८ मोटरसाइकलका चालक ईश्वरपुर नगरपालिका-५, सखुबनी खुबलाल टोलका ३० वर्षीय महतोको मृत्यु भएको थियो ।
