चितवन, १४ असार । चितवनको इच्छाकामना गाउँपालिका ३ का कमल गुरुङ मोटरसाईकल चोरी मुद्दामा जेल परेर छुटेको हप्ता दिन पनि नहुदै पुनः सोही अपराधमा पक्राउ परेका छन्। उनलाई गोरखा प्रहरीले सोमबार मोटरसाईकल चोरी गरि बिक्री गरेको आरोपमा पक्राउ गरेको हो । 

आईतबार शहिद लखन गाउँपालिका ४ जुद्धिटार स्थित सडकमा सोही स्थानका स्थानीय ३४ वर्षिय लोकबहादुर थापाले बा. ८३ प. ३८९३ नं.को १५० सिसिको चलाईरहेको पल्सर मोटरसाईकल चेकजाँच गर्दा चोरीको भन्नेपुष्टि भएपछि थापालाई चोरीको मोटरसाइकल सहित नियन्त्रणमा लिएको थियो। चोरीको मोटरसाइकल सहित प्रहरी नियन्त्रणमा रहेका थापाले इच्छाकामना गाउँपालिका ३ तुर्लुक घर भै हाल कुरिनटारमा बस्ने ३१ वर्षका कमल गुरुङबाट मोटरसाइकल खरिद गरेको बयान दिएपछि गुरुङलाई पक्राउ गरेको थियो । 

उक्त मोटरसाइकल यहि वैशाख ५ गते चितवनको खैरहनी नगरपालिका १ बाट चोरी भएको खुल्न आएको जिल्ला प्रहरी कार्यालय गोरखाले जनाएको छ। उक्त चोरी भएको मोटरसाईकल बरामद गरी मोटरसाईकल सहित लोक बहादुर थापा र कमल गुरुङलाई थप अनुसन्धान तथा कारवाहीको लागि ईलाका प्रहरी कार्यालय खैरहनी चितवनमा पठाईएको जिल्ला प्रहरी कार्यालय गोरखाले जनाएको छ ।

मोटरसाईकल चोरी गरि खरिद बिक्री गरेको आरोपमा पक्राउ परेका गुरुङलाई जेठ १४ गते इलाका प्रहरी कार्यालय आँबुखैरेनी तनहुँले सोही आरोपमा पक्राउ गरि २५ दिन हिरासतमा राखेको थियो । पछि अदालतले १ लाख धरौटीमा रिहा गर्ने आदेश दिएपछि धरौटि बुझाएर हिरासतमुक्त भएका थिए। आरोपित गुरुङ हिरासतबाट मुक्त भएको हप्ता दिन पनि नहुदै आईतबार पुनः मोटरसाईकल चोरी गरि खरिद बिक्री गरेको आरोपमा पक्राउ परेको हो।