अमर खड्का, सुनसरी । सुनसरीको श्रीलङ्का टापु भनेर चिनिने बस्तीमा कोशी नदीले निरन्तर कटान गर्न थालेपछि त्यस क्षेत्रका नागरिक त्रासमा बस्न बाध्य भएका छन् । सुनसरीको बराहक्षेत्र नगरपालिका वडा नम्बर ६ र ९ को आधा–आधा भागमा फैलिएको श्रीङ्लका टापुमा आठ सय घरका तीन हजारभन्दा बढी जनसङ्ख्याको बसोबास रहेको छ ।

सप्तकोशी नदीको पश्चिमी भङ्गालोले बस्ती नजिक पार्दै निरन्तर कटान गरिरहेको छ । जसका कारण स्थानीयबासी त्रसित बनेका छन् । सप्तकोशी नदी नागरिकको घरको ५० मिटर परबाट बगिरहेको छ । जसले गर्दा कतिपय बसाइ सरिरहेका छन् भने कोही बसाइ सर्ने तयारीमा रहेका छन् ।

सप्तकोशीले धार परिवर्तन गरेर उदयपुरबेलकाका पाँचवटा वडामा प्रवेश गरेपछि भने बस्ती उत्तरबाट समेत घेरिएको छ। श्रीलङ्का टापुका बासिन्दाको नम्बरी जग्गा अहिले सप्तकोशीको पश्चिमी भङ्गालो बगि रहेको स्थानमा पर्छ ।

आफ्नो जग्गामा सप्तकोशी नदी बगिरहेको छ, कटान हुँदै आगन सम्म आइपुग्न लागेपछि नागरिक बिकल्प खोजिरहेका छन् । तर, बसिरहेको घर छोडेर अन्यत्र जान सजिलो छैन ।

श्रीलङ्का टापुका बासीन्दालाई कोशी पूर्व तर्फ बराह क्षेत्रमा जानुभन्दा उदयपुरको बेलकामै आउँजाउँ गर्न सहज हुन्छ । उदयपुरको बेलका नगरपालिकाले भने श्रीलङ्का टापुका बासिन्दालाई व्यवस्थापन गर्ने बचन दिँदै आफ्नो पालिका भित्रको सुरक्षित स्थानमा बस्न आग्रह गरेको छ ।

समयमा नै श्रीलङ्का टापुका नागरिकलाई अन्यत्र स्थानान्तरण नगरेको खण्डमा दुर्घटना हुन सक्ने जोखिम बढेको छ । अन्य सुरक्षित स्थानमा सारिदिन र त्यसको व्यवस्थापन पनि गरिदिन नागरिकले सरकारसँग अनुरोध गरेका छन् ।